Samina Raja The Greatest Urdu Poetess

  1. nayya profile image60
    nayyaposted 7 years ago


    ABOUT A GREAT POET


    Samina Raja is the most prolific,competent, and devoted and the greatest poetess of Urdu language.
    Since the publication of her first collection of poetry in 1995,she has published fifteen books.

    The names of her books are Huweda, Shehr-e- saba, Aur Wisal,
    Khwabnaey, Bagh-e-Shab, Baazdeed, Haft Aasman, Parikhana, Adan kay rastay par, Dil- e-Laiyla, Ishqabad and Hijr Nama.

    Love is the pervading theme in her poetry. She crafts her poems with care and believes in adhering to the norms of tradition.
    She writes ghazals, nazms and prose poems and her entire poetry is a reflection of her inner self, a saga of loss and longing.

    She is the editor of three literary magazines, named Mustaqbil, Aassar and Khwabgar.

    Her contributions in creation and promotion of Urdu poetry  and literature are greater than any other poetess.

  2. nayya profile image60
    nayyaposted 7 years ago



    POETRY BY SAMINA RAJA


    POORAY CHAND KI RAAT

    Aankh talak utri aati hai
    pooray chand ki raat
    Jeewan ki lambi rahon parr
    saya sa ik sath
    Honton parr aisi hi lali,
    mathay parr aisay hi sitaray
    Mang mein jagmag jagmag afshan
    aur chunri mein jugnoo saray
    Palkon kay pichhay ik sapna
    aur sapnay mein nain tumharay

    Yaad aai hai aaj mujhay
    ik pichlay janam ki baat
    Bhool gai ab---hath say kaisay
    choota tha woh hath!



    SURKH AUR NEELAY PHOOL


    Aik jhurjhuri lay kar
    jagti thi betabi
    raat ka andhera jab
    boond boond girta tha
    dil ko choonay lagtay thay
    teray reshmin alfaz
    khwab chshm-e-heran ko
    jhuk kay choom leta tha

    raat bheeg jati thi
    barishon ki khushboo mein
    teray garm honton say
    soam rass tapakta tha

    surkh aur neelay phool
    iss badan pay khiltay thay
    subh kay kinaray par,
    donon waqt miltay thay

  3. nayya profile image60
    nayyaposted 7 years ago



    GHAZAS BY SAMINA RAJA

    ***

    Ilhaam, wahhi k shairi hai
    Iss dil pay jo aaj utar rahi hai

    Yeh wasl hai ya main khwab mein hoon
    Hai khwab k wasl ki ghari hai?

    Soya hai wajood aur dil mein
    Ik cheez ajeeb jaagti hai

    Khushboo say mehek raha hai aangan
    Aur tan pay bahaar aa gaei hai

    Aaghosh mein khill uthha hai gulshan
    Hontoan pay gulon si taazgi hai

    Aankhon mein charagh jall rahay hain
    Maathay pay anokhi roshni hai

    Kuch door pay hai khizaan ka dera
    Basti yeh bahar mein basi hai

    Main raah pay teri chal rahi hoon
    Duniya meri samt dekhti hai

    Kam hon gay aseer-e-yad-e-janan
    Yeh bhi to ataey zindagi hai



    ***

    Honay pay main apnay roa rahi hoon
    Hasti ka yeh daagh dho rahi hoon

    Shakhon pay meri khilaein gay sooraj
    Mitti mein kiran jo bo rahi hoon

    Uss shakhs ka dekhna qayamat
    Khud apna suragh kho rahi hoon

    Kis ranj say hath paaon shall hain
    Aur zard tamam ho rahi hoon

    Kis baat say dil dukha huwa hai
    Aansoo kay bagher roa rahi hoon

    Ab tark bhi kar chuka to kya gham
    Main teri murad to rahi hoon

    Banhon mein simat gaei hoon apni
    Aaraam ki neend so rahi hoon


    ***

    Dekha nahin iss misal ka chand
    Sehra mein laga kamal ka chand

    Reh reh kay ufuq say jhankta hai
    Sharmaya huwa, wisal ka chand

    Mshriq say ajab hawa chali thi
    Gul honay laga shimal ka chand

    Lao day uthay pichhlay saal kay dukh
    Nikla hai jo aglay saal ka chand

    Bujhti hai teri nigah ya phir
    Dhalta hai meray jamal ka chand

    Chehra jo tera na dekh paei
    Kya dekhti phir shewal ka chand




    ***


    Kuchh ranj na koei be qarari
    Dil par hai ajab sakoot tari

    Takseem to ho rahi hai rahat
    Aati hi nahin hai meri baari

    Ulfat mein tha sehl jaan dena
    Ik cheez yehi thi ikhteyari

    Dil dard mein doobta tha lekin
    Aankhoin say huway na ashk jaari

    Sab choom kay pichhay hat gaey thay
    Pathar tha wafa ka sakht bhaari

    Dushman ki sipaah bhi thi shashdar
    Iss shaan say main nay jang haari

    Afsos tha pichlay mosamon ka
    Yeh rutt bhi mili to intazaari

    Jab ban gaya aasman, samander
    Saahil pay buss aik shab guzari

    Iss baar na bach sakay gi shayad
    Chahat ko laga hai zakham kaari


    ***

    Kanton mein gulab dekhti hoon
    Main aaj bhi khwab dekhti hoon

    Ik ranjish-e-be sabab kay ba'is
    Khana hi kharab dekhti hoon

    Aankhon mein dhuwan sa bhar raha hai
    Manzil ko sarab dekhti hoon

    Ik harf-e-ghalat huwi hoon jiss mein,
    Hasti ki kitab dekhti hoon

    Aankhein jo khulin,to khud pay khultay
    Tanhaei ka baab dekhti hoon


    ***


    Ik hasrat-e-aab ho gaei hoon
    Main khud hi saraab ho gaei hoon

    Likhi hoon ik ajnabi zaban mein
    Honay ko,kitaab ho gaei hoon

    Ik khwab mein jii rahi thi ab tak
    So khwab hi khwab ho gaei hoon

    Tha kitna saja huwa yeh chehra
    Aur kesi kharab ho gaei hoon

    Ginta jo raha woh mujhh ko har pal
    Be hadd-o-hisab ho gaei hoon

    Gohar thi kabhi dil-e-sadaf mein
    Ab naqsh br aab ho gaei hoon

    Karti thi sawal zindgi say
    Ab apna jawab ho gaei hoon

    Too bethh kinar-e-ishq, main to
    Sohni ka Chanab ho gaei hoon

    Ab toar liya chaman say rishta,
    Jangal ka gulaab ho gaei hoon


    ***

    Rastay mein diya jala rahi hai
    Jangal ki hawa bula rahi hai

    Ab raaz na reh sakay gi chahat
    Yeh shoakh,jo gull khila rahi hai

    Ik dard para hai palenay mein
    Aur yaad usay hila rahi hai

    Aankhon pay khulay hain pankh iss kay
    Ik aas mujhay sula rahi hai

    Chhatri pay sajay hain kuchh kabootar
    Aur chandni jhhilmila rahi hai

    Thhandak hai badan mein iss bala ki
    Ab barf mujhay jala rahi hai

    Kis shakl ko bhoolnay lagi main
    Kya zeest mujhay bhula rahi hai

    Peeni hai nabeez-e-ishq mujh ko
    Woh aankh agar pila rahi hai

    Phir zindgi jaisay dartay dartay
    Ranngon say nazar mila rahi hai


    ***


    Ik pall ko,na raat so saki main
    Uss khwab ki aas mein rahi main

    Jab dheyan mein aa gaya woh chehra
    Sonay kay bajaey, roa pari main

    Bass aik hi yaad mein garifta
    Dil thaam kar apna reh gaei main

    Bass aik hi ranj say shikasta
    Kion uss say bhala juda huwi main

    Bass aik khayal dil pay taari
    Woh jagta,sath jagti main

    Hota woh agar qareeb meray
    Phir chhoo kay bhi uss ko dekhti main

    Khush baash rahay,sada jiey woh
    Par uss say bichhar kay marr gaei main

    Zahir mein to sans lay rahi thi
    Zinda thi bagher-e-zindgi main

    Chandi say badan pay tha andhera
    Uss chand say kitni door thi main


    ***

    Tanha, sar-e-anjuman khari thi
    Main, apnay wisaal  say  bari  thi

    Haan phool thi, aur hawa ki zad par
    Phir  meri  har  aik  pankhari  thi

    Ik   umr   talak   safar   kya   tha
    Manzil pay pohanch kay gir pari thi

    Talib  koi  meri  naffi  ka  tha
    Aur shart yeh mot say kari thi

    Woh aik  hawa-e-taaza  mein  tha
    Main, khwab-e-qadeem mein gari thi

    Woh, khud ko Khuda samajh raha tha
    Main,  apnay  huzoor mein  khari  thi


    ***

    Bann karr to rahi main uss ka saya
    Woh mera libaas bann na paya

    Kuchh waqt hi darmiyan aaya
    Main nay to usay nahin bhulaya

    Dunya to nahin ujar ga'ei hai
    Ik shakhs agar huwa paraya

    Jaisay thi main raet parr ko'ei naqsh
    Yoon moj nay barh kay aa mitaya

    Ik deep hawa kay haath parr tha
    Aur main nay bhi ik diya jalaya

    Ik raag tha raat kay labon parr
    Aur main nay bhi aik geet gaya

    Sehra ki tarah chamak utthi main
    Woh chand kabhi jo jagmagaya

    Manzil teri aur thi to mujh ko
    Kis wastay hamsafar banaya?


    ***

    Too saath hai,bass isi khushi mein
    Dkha na kuchh aur zindgi mein

    Rastay mein hazar dasht-o-darya
    Guzri hoon main aik be khudi mein

    Iss tarah ka ishq aur saliqa
    Paya tha faqat ik aadmi mein

    Iss khwab ko dhoop say bachana
    Chatka hai jo shabb ki roshni mein

    Mehman tha woh aaj doosron ka
    Aaya to sahi,meri gali mein

    Mosem na faza ka ranng dekha
    Itna tha malaal meray ji mein

    Maaloom tha mujh ko rannj day gi
    Har channd maza tha aagahi mein

    Khwahish bhi rahi ke kuchh kahay woh
    Tha lutf bhi aik, ann kahi mein

    Dekha nahin mujh ko,sabb ko dekha
    Asbaat tha kaisa uss naffi mein !



    ***

    Ik paer ki oat mein chhupa tha
    Woh door say mujh ko dekhta tha

    Woh paas raha magar kuch aisay
    Saya kisi sa'ey say mila tha

    Pani mein ghula tha aks mera
    Uss aks mein ko'ei doobta tha

    Ik phool meray ujaar bann kay
    Goshay mein kahin khila huwa tha

    Ik chaand nikal kay baadlon say
    Phir baam pe meray aa gaya tha

    Woh shoq say do charagh aankhein
    Lay karr meri raah mein khara tha

    Woh haath ajeeb baankpann say
    Ik baar meri taraf barha tha

    Woh geet jo uss nay gungunaya
    Jaisay kabhi neend mein suna tha

    Be saakhta mein nay chhoo kay dekha
    Bilkul hi woh meray khwab sa tha!


    ***

    Phir khwab ko'ei naya day
    Ay raat! mera diya jala day

    Ik baat adhoori reh ga'ei hai
    Ko'ei meray doast ka pataa day

    Abb chhor day kar-o-bar-e-dunya
    Be sakhta abb mujhay sada day

    Jo barf jami huwi hai mujh parr
    Abb dast-e-bahar say hata day

    Main saans to lay sakoon dobara
    Seenay sar yeh sanng-e-gham hata day

    Ik naqsh bana kay raet parr woh
    Chahay to ko'ei hawa chala day

    Hoanay ka yaqin dila'ay mujh ko
    Woh ghamm jo mujhay mera khuda day


    ***


    Dill bujh sa gaya tha rahton mein
    Phir zinda huwa teray ghamon mein

    Uss lutf nay karr diya tha be zaar
    Lutf aanay laga hai ranjishon mein

    Ik baat ajeeb uss nay ki thi
    Neend aanay ki pehli sa'aton mein

    Chehra na mein uss ka dekh pa'ei
    Aankhein jo chhupi thein aansoo'on mein

    Shamil thi kisi ki narm aawaz
    Iss dill ki udaas dharkanon mein

    Tanha'ei bhi sath chall rahi thi
    Rasta bhi nahin tha janngalon mein

    Patharsa gira tha aks-e-mahtaab
    Ik jheel kay sabz pani'on mein

    Kya cheekh thi jiss say goonj utha tha
    Sannata, khamoash wadiyon mein

    Kya hijr tha, jiss kay khwab dekhay
    Aur sakht wisaal kay dinon mein!

    ***   


    Jabb dhoop na chandni huwi main
    Kis ranng ki roshni huwi main

    Kis taal pe dill dharak rahay thay
    Too raag tha, raagni huwi main

    Thi teray darash ki saari shoabha
    Uss roaz say kaamni huwi main

    Chhoonay say teray huwa chamatkaar
    Ik raat mein, padmani huwi main

    Jis ghamm mein liya hai joag too nay
    Uss dard say,   kaasni huwi main

    Khud apnay hi dill mein garr ga'ei hoon
    Naeza tha woh ishq, ani huwi  main!

    Kis tarah na toot karr bikharti?
    Pathar say na thi bani huwi main!

 
working